客家三腳採茶戲个棚頭(14)-文明勸善歌
HTML-код
- Опубликовано: 11 апр 2025
- 客家三腳採茶戲个棚頭-文明勸善歌
參考資料：客家三腳採茶戲个棚頭第68篇（新竹縣海陸客家語文協會出版)
朗讀配音製作：黃六
腔調：客語、海陸腔
聽涯來唸，文明勸善歌，唸出文明並笑科。現下科學真進步，耕田毋使用牛拖，燈火毋使用油點，米穀毋使人挨磨，出門毋使用行路，起風落水有車坐。騎車毋使用腳踏，滿哪仔機車出真多，頭擺坐轎上等客，現今有轎無人坐。時代進步係真快，自用轎車也盡多。現下幾多新發明，豬嫲毋使牽豬哥，雞卵毋使雞嫲孵，電器孵出有真多。有錢得病毋會死，盲腸危症用開刀，梅毒癜花用注射，皮膚爛疤用藥膏，傷風感冒用便藥，神頭陰鬼愛用和。
有錢做得飛上天，天邊海角去得到。食飽想愛聽歌曲，都有電視並〈啦濟喲〉(收音機)，誰人都係時常聽，社會水準有提高。現下婦人福氣靚，煮飯毋使用樵草，用瓦斯還係嫌麻煩，講愛用人來點火。用電鍋最標準，時間到煮好好，井水毋使用手打，電一開送到到。雞肉鴨肉，毋使用鹽滷，放落冰箱第一好，兩三日拿來食，一點野味也就無，衛生並清潔，安全掛擔保。都市人先享福，鄉下人也跈得到，想愛看電影，毋使來買票，電視打開看得着，毋使戲院來相爭，自己家中安樂坐。
想愛出門看風景，遊覽車載到到。遊覽小姐唱歌曲，麼人都可摎佢和，自由人客來注文，看你愛唱麼个歌，也有九腔十八調，也有滿山趖(散板山歌小調)，西皮外江亂彈曲(粵徽唱腔歌曲)，國語學老語流行歌。遊覽小姐毋單淨會唱歌，也會講古並講傳，也會來講，文明大笑科。車頂坐等聽歌曲，般般憂愁全變無。到該風景區，食點心愛先問好，有問價就較便宜，無問價錢就多。台灣一周遶往轉，社會百般看得多。看着男人好食煙，女人好電毛，電毛千百種，著衫連肉看得着，奶姑挶撐撐，專著高㬹靴。有人著个大圓裙，著條三角褲，出門儘採亂竄坐，車頭坐等來等車，腳骨擎到半天高，半滴見笑都毋知，五倫全變無。嫁娶毋使用媒人，公證結婚有真多，無分爺哀來主意，忠孝廉節也就無。老人家真毋慣，後生人毋聽人指導，恁樣還較爭，又來囉哩又囉嗦，開口就閼死人。問佢以前恁勤儉，錢乾曬幾多？有田耕種欠租穀，糜杓仔胖胖浮。出有子弟無讀書，誤人前途有真多，現今耕種戴高樓，也有做議員，大學畢業也真多。以前㧡擔著草鞋，現下坐車著皮靴。如今人心日日變，行善較少惡較多，若係你毋信，街頭巷尾詳細看，鱸鰻全出少年哥，頸偏偏褲帶挶毋捆，專挶〈襖羅伯庫〉(後梳式油頭All Back)留長毛。涯看着恁可惜，所以來做出，文明勸善歌，奉勸男女要修心，各人修心各人好，想愛踏入文明社會來，差事定著莫去做，士農工商愛認真，增產報國名譽高。大家聽轉添福壽，日後火箭共同坐啊共同坐。
阿六哥
實在慶
棚頭肚
恁生趣
麽个有
當湛斗
讚